KASAGUTAN PARA SA MGA SEVENTH-DAY ADVENTISTS, VERSE-BY-VERSE ON MATEO 24:20 - "HUWAG MANGYARI ANG INYONG PAGTAKAS SA ARAW NG SABBATH?""

 

“At magsipanalangin kayo na huwag mangyari ang pagtakas ninyo sa panahong taginaw, o sa sabbath man:” (Mat 24:20)

Challenge ng mga Sabadista:

"Ipinapakita talaga sa Mateo 24:20 na hindi binago ni Jesus ang araw ng pagsamba mula Sabado patungong Linggo para sa mga sumusunod sa kanya. Ang sinabi niyang pagtakas ay isang hula tungkol sa pagkawasak ng Jerusalem noong taong 70 AD, na mangyayari pa pagkatapos ng 40 taon mula nang umakyat siya sa langit. Kaya, inaasahan pa rin ni Jesus na ang mga Kristiyano ay mangingilin pa din ng tuwing araw ng Sabbath kahit matagal na siyang nakabalik sa langit."

Sagot:

Mahalagang maintindihan ng mga Sabadista ang pinagmulan ng mga sinabi ni Jesus sa Mateo 24:20 na galing sa tradisyon ng mga Judio:

Ang Ebanghelyo ni Mateo ay para sa mga Kristiyanong Judio

Una, ang mga apostol na kausap ni Jesus dito ay pawang mga Judio, kaya binanggit niya ang tungkol sa Sabbath dahil mahalaga ito sa kanilang paniniwala at kultura.

Pangalawa, ang mga salitang 'huwag mangyari ang pagtakas ninyo sa panahong taginaw, o sa sabbath man' ay hindi sinabi ng ibang manunulat ng Ebanghelyo tulad nina Marcos, Lucas, at Juan. Halimbawa, si Marcos ay nagbigay din ng babala tungkol sa pagtakas sa Marcos 13:18: 'At magsipanalangin kayo na ito'y huwag mangyari sa panahong taginaw.' Halos pareho ang sinabi ni Marcos at Mateo, maliban sa salitang Sabbath na hindi binanggit ni Marcos. Binanggit ni Mateo ang salitang 'Sabbath', pero walang binanggit si Marcos. 

Maraming dalubhasa sa Bibliya, liberal man o conservative, ang naniniwalang mas unang naisulat ang Ebanghelyo ni Marcos kaysa kay Mateo. Kung mas nauna nga ang sulat ni Marcos, bakit hindi niya binanggit ang Sabbath samantalang binanggit ito ni Mateo? Ang dahilan ay isinulat ni Marcos ang kanyang Ebanghelyo para sa mga mananampalataya sa Roma na karamihan ay mga Kristiyanong Gentil na pinag-uusig at hindi gaanong mahalaga sa kanila ang Sabbath hindi tulad ng mga Judio. 

Samantala, ang Ebanghelyo ni Mateo ay isinulat para sa mga Kristiyanong Judio, mula sa pananaw ng isang tunay na Judiong si Mateo. Naiintindihan niyang mabuti ang kahalagahan ng pagpapahinga sa Sabbath, lalo na sa panahon ng kaguluhan o pag-uusig. Kaya, idinagdag niya ang Sabbath sa babala ni Jesus para sa mga Kristiyanong Judio na makaka-relate sa babala ni Jesus tungkol sa Sabbath kapag dumating ang pag-uusig sa kanila.

Alam ni Jesus na ang mga Kristiyanong Judio, pati na rin ang mga Judiong hindi sumasampalataya sa kanya, ay patuloy pa ring mangingilin ng Sabbath noong sinimulan nang lusubin ng mga sundalong Romano ang Jerusalem noong taong 70 AD. Kaya, malinaw na ang babalang ito tungkol sa pag-iwas sa pagtakas sa araw ng Sabbath ay hindi talaga para sa mga Kristiyanong Gentil, at kaya hindi na ito isinama ni Marcos sa kanyang Ebanghelyo. 

Sang-ayon sa Church History

Sa katunayan, sinusuportahan ni Eusebius, isang sinaunang historian ng early church, ang paniniwala na lumikas ang mga Kristiyanong Judio papuntang Pella. Sa kanyang librong 'Ecclesiastical History' (3.5.3), isinulat noong 4th century AD ni Eusebius Pamphili: 'Ang mga mananampalataya ng simbahan sa Jerusalem ay inutusan sa pamamagitan ng isang pahayag... na lisanin ang lungsod bago magsimula ang digmaan at tumira sa isang bayan sa Perea na tinatawag na Pella.'[1] Ito ay katuparan ng hula ni Jesus sa Mateo 24:16: 'Kung magkagayo'y magsitakas sa mga bundok ang nangasa Judea,' kung saan malinaw na ang mga pinapalikas lamang ay yaong nasa Judea, isang lugar ng mga Judio. Ayon sa Easton's Bible Dictionary, 'ang probinsya ng Judea, na iba sa Galilea at Samaria, ay sakop ang mga lugar ng mga tribo ni Juda, Benjamin, Dan, Simeon, at bahagi ng Ephraim.'[2]

Kaya, ang babala ni Jesus na huwag mangyari ang pagtakas sa araw ng Sabbath ay hindi para sa lahat ng mga Kristiyano noon. Sa halip, ito ay para lamang sa mga Kristiyanong Judio na nasa panahon ng pagbabago at hindi pa nila lubos na naiintindihan na si Cristo ang katuparan at katapusan ng Sabbath (Roma 10:4; Col. 2:16-17). Kaya malaking pagkakamali para sa mga Sabadista na isipin na lahat ng mga Kristiyanong Gentil ay nangingilin pa rin ng Sabbath noong taong 70 AD at pagkatapos nito. 

Alam ni Cristo at ni Marcos na hindi sila apektado ng babalang ito. Tanging ang mga Kristiyanong Judio lang ang maaapektuhan ng taglamig at pagtakas sa araw ng Sabbath. Ito ay dahil sa araw ng Sabbath sa taglamig, malakas ang ulan sa Judea na nagpapahirap o imposible ang paglikas papunta sa kabundukan dahil sa mga baha sa mga daan at lambak. Bukod dito, mahirap tumakas sa araw ng Sabbath dahil maaari lang silang maglakbay nang hanggang isang kilometro (Exodo 16:29; Bilang 35:5; Josue 3:4), na hindi sapat para makalayo sa panganib ng kamatayan.

Malinaw, kung gayon, na ang babala ni Cristo sa Mateo 24:20 tungkol sa pag-iwas sa pagtakas sa araw ng Sabbath ay para lamang sa mga Kristiyanong Judio at hindi kasama ang mga Gentil. Gusto ko ring bigyang-diin na ang sakop lamang ng babalang ito ay para sa mga Kristiyanong Judio na taga-Judea, na hindi pa lubos na iniiwan ang nakaugaliang pangingilin ng Sabbath dahil malalim na ang ugat nito sa kanilang relihiyon at kultura. 

Isang malaking pagkakamali rin kung gagamitin ng mga Sabadista ang Mateo 24:20 bilang basehan sa paniniwalang ito'y mangyayari muli sa hinaharap, tulad ng sa sinasabing Sunday Law. Ang ilan sa mga Sabadista ay 'tumatakas' na ngayon sa mga bundok bilang paghahanda, na nakakalungkot dahil marami ang mga namatay sa kanila dahil nagkasakit. Ito dahil hindi nila naiintindihan na ang babala ni Cristo ay para lamang sa mga Kristiyanong Judio na nasa Judea, isang lugar na tinitirhan ng mga Judio. 

Sagot sa Objections ng mga Sabadista:

Sabadista: "Bakit mo sinasabing mga Kristiyanong Judio lang ang nagpapahinga sa Sabbath bago winasak ang Jerusalem noong 70 AD, gayong marami na ring mga Kristiyanong hindi Judio ang sumasamba tuwing araw ng Sabbath, ayon sa Gawa 13:42-44?"

Sagot: 

Basahin muna natin kung ano ang sinasabi sa talatang madalas nilang gamitin sa Gawa 13:42-44:

"At pagalis nila, ay kanilang ipinamanhik na salitain sa kanila ang mga salitang ito sa sabbath na susunod. Nang makaalis nga ang kapisanan sa sinagoga, marami sa mga Judio at nangaging-Judiong masisipag sa kabanalan ay nagsisunod kay Pablo at kay Bernabe; na, sa pagsasalita sa kanila, ay sila'y hinimok na magsipanatili sa biyaya ng Dios. At nang sumunod na sabbath ay nagkatipon halos ang buong bayan upang pakinggan ang salita ng Dios."(Act 13:42-44 Tagalog AB)

Tama ang sinasabi ng talata tungkol sa mga hindi Judio. Sa wikang Griyego, ang salitang 'Gentiles' dito ay galing sa salitang 'ethnos', na ayon sa Vine’s Complete Expository Dictionary ay 'kung minsan ginagamit para sa mga hindi Judiong naging Kristiyano, kaiba sa mga Judio.' Ipinaliwanag din sa sumunod na talata, sa bersyon ng King James Version sa Gawa 13:43, kung anong klaseng mga hindi Judio ito bilang 'religious proselytes,' na sa Revised Tagalog Popular Version ay tinawag na 'mga debotong Hentil na nahikayat mula sa relihiyong Judaismo.' Kaya, hindi ito tumutukoy sa mga Kristiyanong Hentil na walang background ng Judaism, kundi, sa mga Hentil na nahikayat sa relihiyong Judaismo, kaya hindi nakakapagtakang nangingilin sila ng Sabbath. 

Patunay din na hindi sila mga Kristiyanong Hentil ang sumunod na pangyayari: pagkatapos silang usigin ng ilang pinuno ng mga Judio sa sinagoga dahil sa marami silang nahihikayat, sinabi ni Pablo, 

"Kinakailangang salitain muna ang salita ng Dios sa inyo. Yamang inyong itinatakuwil, at hinahatulan ninyong hindi kayo karapatdapat sa walang hanggang buhay, narito, kami ay pasasa mga Hentil." (Gawa 13:46 Tagalog AB)

Kung mga Kristiyanong Hentil na ang tinutukoy, bakit pa sinabi ni Pablo na 'pupunta kami sa mga Hentil'? Kaya malinaw na hindi ito sapat na dahilan para sabihin ng mga Sabadista na ang mga unang Kristiyanong Hentil ay nagpapahinga sa Sabbath, dahil sila muna ay naging 'religious proselytes,' o nahikayat muna sa Judaismo bago naging Kristiyano.

Gusto ko ring ipaalala na ang lugar ng Sinagoga sa Gawa 13:42-44 ay hindi sa Judea (Mat. 24:16). Inutusan ni Jesus ang mga tao na tumakas sa mga bundok doon dahil walang mga Hentil na nakatira sa Judea. Ang nangyari sa Gawa 13:42-44 ay sa Antioquia ng Pisidia (v. 14), kung saan maraming mga Hentil na nahikayat sa Judaismo (mga 'religious proselytes') dahil ito ay teritoryo ng mga Hentil. Kung ipipilit ng mga Sabadista na dapat pa rin nating sundin ang pangingilin ng Sabbath sa Gawa 13:42-44, dapat din nating makita silang sumasamba sa mga Sinagoga ng mga Judiong tumutol kay Cristo (tinawag na 'Sinagoga ni Satanas' sa Apoc. 2:9 at 3:9) sa panahon natin ngayon, hindi sa simbahan ng Seventh-Day Adventist tuwing Sabado.

Bago winasak ang Lungsod ng Jerusalem noong 70 AD, maraming Kristiyanong Judio at mga Hentil na nahikayat sa relihiyon ng mga Judio ang patuloy na nangingilin ng Sabbath. Ginawa nila ito kahit napagdesisyunan na sa Jerusalem Council (Gawa 15) noong 50 AD na hindi na ito kailangan ipangilin ng mga Kristiyano, Judio man o Hentil. Ang mga Kristiyanong Judio at ang mga Hentil na nahikayat sa relihiyon ng mga Judio ay hindi dapat tularan ng mga Kristiyano ngayon. Ito ay dahil hindi pa ganap ang kanilang pananampalataya at tinanggihan nila ang opisyal na desisyon ng Jerusalem Council at ang pasya ng Banal na Espiritu (Gawa 15:28-29) na hindi na kailangang sundin ang mga utos ng Lumang Tipan, kasama na ang pagpapahinga sa lingguhang Sabbath. 

Nakakalungkot isipin na ginagawa ngayong halimbawa ng mga Sabadista sa kanilang pangingilin ng Sabbath ang mga Judiong Kristiyano at mga Hentil na nahikayat sa relihiyon ng mga Judio na hindi pa ganap na matatag sa kanilang pananampalataya.

Conclusion:

Sa kabuuan, malinaw na nagbigay ng babala si Jesus sa mga Kristiyanong Judio at later on pati na rin sa mga Hentil na nahikayat noon sa relihiyon ng mga Judio (hindi kasama dito ang mga Kristiyanong Hentil) sa Mateo 24:20 na manalangin para sa kanilang kaligtasan habang tumatakas sa malapit nang pagkawasak ng Jerusalem noong 70 AD. Inisip ni Jesus ang parehong problema sa praktikal (ang taglamig) at ang usaping pangrelihiyon (ang Sabbath).

Kaya, masasabi nating ipinapakita ng Mateo 24:20 na alam ni Cristo na marami pa ring Kristiyanong Judio at mga Hentil na nahikayat sa relihiyon ng mga Judio (proselyte Jews) ang nangingilin ngSabbath noong panahong iyon. Gayunpaman, hindi ito maaaring gamitin ng mga Sabadista bilang patunay na ang lahat ng Kristiyano ngayon ay kailangang magpahinga sa lingguhang Sabbath dahil salungat ito sa tunay na kahulugan ng Gawa 13:42-44. Ang patuloy na pagbaluktot ng mga Sabadista sa mga talatang ito ay tulad ng babala ni apostol Pedro na mga taong: "binabaluktot ng mga walang alam at ng mga hindi matatag" (2 Ped. 3:16).

References:

[1] Eusebius Pamphili, Ecclesiastical History, Book III, Chapter 5, Section 3.

[2] M. G. Easton,  Easton’s Bible Dictionary. (2017) article on 'Judea'