ANG KAHULUGAN KAMATAYAN NI KRISTO SA KRUS

Introduction

Ang kamatayan at pagdurusa ni Jesus sa krus ay hindi lamang ang katapusan ng kuwento; sa pamamagitan nito, nakamit Niya ang pantubos para sa kabayaran ng ating kasalanan. Dahil dito, maraming teorya ng pagbabayad-sala o mas kilala sa wikang English bilang "Atonement." ang sumibol sa loob ng Christian church sa paglipas ng panahon. Sa artikulong ito, ang "Penal Substitution view" ng atonement, na may matibay na saligan sa Bibliya, ang ating tatalakayin. Pagkatapos, titingnan natin ang ilang mga kilalang teorya ng atonement sa kasaysayan Christian church na tahasang sumasalungat sa pananaw na ito. Ang Penal Substitution view ng atonement ang pinaka-sentrong doktrina na nagbibigkis sa lahat ng pananaw tungkol sa krus. Sa kabaligtaran, ang ibang pananaw ay tila nagtatangkang isantabi ang ilang mahalagang dimensyon ng kahulugan ng kamatayan ni Kristo sa krus, habang ang Penal Substitution view ang siyang kumikilala sa kabuuan nito.

Penal Substitutionary Atonement

Sa doktrina ng Penal Substitution, pinaniniwalaang si Kristo ang kusang-loob na tumanggap ng parusa na nararapat sa ating mga makasalanan. Siya ang ating kapalit (substitute), na namatay upang pagbayaran ang poot ng Diyos laban sa kasalanan. Ang banal na karakter ng Diyos ay nangangailangan ng pagpaparusa sa kasamaan upang mapawi ang Kanyang galit. Ang konseptong ito ng pagpapalit (substitution) ay nagmula pa sa Lumang Tipan, kung saan ang mga handog na hayop ay iniaalay bilang simbolo ng pagtubos. Ang mga haing ito ay natupad sa pamamagitan ni Jesu-Kristo, "ang Kordero ng Diyos, na nag-aalis ng kasalanan ng sanlibutan" (Juan 1:29), na siyang inialay upang mapagbigyan ang katarungan ng Diyos. Dahil dito, ang galit ng Diyos ay lubos na nasiyahan (satisfied) kay Jesus para sa lahat ng sumasampalataya. Ang paniniwalang ito ay may malalim na kasaysayan at muling sumibol noong 16th century Protestant Reformation, at itinuturing na pundasyon ng lahat ng iba pang mga pag-unawa sa Atonement.

The Ransom Theory

Itinuturo ng Ransom Theory na binayaran ng Diyos si Satanas upang palayain ang tao mula sa kanyang pagkaalipin, kung saan ang kamatayan ni Kristo ang siyang bayad. Ipinapahiwatig nito na naloko ng Diyos si Satanas sa pamamagitan ng muling pagkabuhay ni Kristo. Ang teoryang ito ay nagmula kay Origen (3rd century AD) at gumagamit ng 1 Corinto 6:20 upang suportahan ang ideya na ang pantubos ay napunta kay Satanas.

Subalit, ang Ransom Theory ay hindi suportado ng Kasulatan. Bagama't si Kristo ay isang pantubos, ang ideya na Siya ay ibinayad kay Satanas at hindi Niya pinawi ang galit ng Diyos ay taliwas sa Bibliya. Binabalewala nito ang katarungan ng Diyos at nagbibigay ng labis na kapangyarihan kay Satanas. Walang utang ang Diyos kay Satanas. Sa halip, si Jesus ay inihandog sa Diyos upang bayaran ang hinihingi ng Kanyang katarungan para sa ating mga kasalanan. Ang Atonement ay gawa ng Diyos sa Kanyang sarili, at si Jesus ang ating pantubos.

The Example Theory

Ang Example Theory, na sumikat noong ika-16 na siglo sa pangunguna nina Faustus at Laelius Socinus, ay nagtuturo na ang kamatayan ni Kristo ay hindi para sa pagbabayad-sala kundi upang magsilbing halimbawa ng pagsunod sa Diyos. Binibigyang-diin nito ang Kanyang pagtitiwala sa Diyos hanggang kamatayan bilang isang modelo para sa atin, na binabanggit ang 1 Pedro 2:21 at 1 Juan 2:6 bilang suporta.

Bagama't kinikilala nito si Kristo bilang ating halimbawa, ang Example Theory ay nagkukulang sa pag-unawa sa bigat ng ating kasalanan at sa katarungan ng Diyos. Ginagawa nitong parang walang gaanong saysay ang pagsunod ni Jesus. Ang Kanyang pagsunod hanggang kamatayan ay hindi lamang isang halimbawa; ito ang mismong kabayaran na nagligtas sa atin mula sa kasalanan at nagbibigay-inspirasyon sa ating pagsunod. Ang isang baluktot na pananaw sa pagtubos ay nagpapahina sa kahulugan ng halimbawa ni Kristo.

The Moral-Influence Theory

Itinuturo ng Moral Influence Theory na ang kamatayan ni Kristo ay pangunahing pagpapakita ng pag-ibig ng Diyos, na dapat magbukas ng ating mga puso sa Kanya. Ayon dito, hindi nangangailangan ang Diyos ng bayad para sa kasalanan; ang tao ang nangangailangang maging mas malapit sa Diyos sa pamamagitan ng pagkaunawa sa pakikiramay Niya sa ating kalagayan sa krus. Unang iminungkahi ni Peter Abelard (1079–1142 AD) at kalaunang itinaguyod nina Horace Bushnell (1802–1876) at Hastings Rashdall (1858–1924).

Gayunpaman, ang teoryang ito ay labis na nagbibigay-diin sa pag-ibig ng Diyos habang binabale-wala ang Kanyang kabanalan at katuwiran. Hindi nito kinikilala ang matuwid na galit ng Diyos sa kasalanan at ang pangangailangang ito ay mapawi. Ang ating kawalan ng kapanatagan sa Diyos ay dahil tayo ay mga rebelde. Oo, ipinapakita ng krus ang pag-ibig ng Diyos, ngunit ang buong kahulugan nito ay makikita lamang kung mauunawaan natin na si Kristo ay namatay bilang kapalit ng mga makasalanan.

The Governmental Theory

Ang Governmental Theory ay nagtuturo na ang kamatayan ni Kristo ay isang paraan upang ipakita ang kasamaan ng kasalanan at pigilan ito. Naniniwala ito na may karapatan ang Diyos na magparusa ngunit hindi obligado, kaya namatay si Kristo upang ipakita ang kahalagahan ng paglayo sa kasalanan. Ang kapatawaran ay ibinibigay sa mga nagsisisi dahil sa biyaya ng Diyos, hindi dahil sa kamatayan ni Kristo. Binuo ni Hugo Grotius (1583-1645 AD) ang pananaw na ito.

Ngunit si Kristo ay hindi lamang nagpakita ng paghatol; tinanggap Niya ito sa ating lugar (substitute). Ang walang hanggang pagdurusa ng mga hindi nagsisisi ay hindi lamang dahil sa kapangyarihan ng Diyos, kundi dahil sa Kanyang katarungan. Pinarusahan ng Diyos si Kristo, hindi lamang ipinakita ang Kanyang galit. Minamaliit ng teoryang ito ang kasalanan at ang pag-ibig ng Diyos, at ginagawang isang simpleng pagpapakita ang gawa ni Kristo. Ang maling pag-unawa sa kabayaran ni Kristo ay humahadlang sa atin na makita ang tunay na kahulugan ng Kanyang kamatayan at ang lalim ng Kanyang pag-ibig bilang ating pantubos.

Conclusion

Ang mayamang kasaysayan ng Kristiyanismo ay nagbunga ng iba't ibang teorya ng Atonement, bawat isa ay sumasalamin sa malikhaing pag-iisip ng tao. Subalit, ang tunay na pagsusuri ng mga teoryang ito ay dapat nakabatay sa awtoridad ng Kasulatan. Sa ating pagsisiyasat, lumilitaw na ang bawat teoryang nabanggit ay isang pagtatangka na itampok ang isang bahagi lamang ng katangian at gawa ng Diyos, na nagreresulta sa isang pinahina at hindi kumpletong larawan ng kaligtasan na natamo sa krus. Ang pagtingin lamang sa isang aspeto ng Atonement ay parang pagtukoy sa rainbow bilang kulay ube lamang, habang binabalewala ang asul, dilaw, berde, at iba pa. Sa halip, kapag nauunawaan natin na ang Penal Substitution view ng Atonement  ang siyang sentro ng Atonement, masasaksihan natin ang buong kaningningan ng plano ng Diyos. Ito ay tulad ng pagkamangha sa kagandahan buong rainbow, kung saan ang bawat kulay ay may kahulugan at nakikipag-ugnayan sa iba, hindi lamang isang kulay na nag-iisa. Ang buong kaluwalhatian ng Diyos ay nahahayag kapag kinikilala natin Siya sa Kanyang kabuuan, at ang wastong pag-unawa sa Atonement  ang nagbubukas ng pintuan tungo sa ganitong pagkakilala.