“NANANATILI PA BA ANG KAUTUSAN DAHIL HINDI PA NATUTUPAD ANG RESURRECTION SA DANIEL 12?”

Marte Centeno

Bro. Sa topic mo na sda verse by verse march 16 Bro., kasama sa propesiya eh. Resurrection sa Dan 12. Kung hindi pa ito fulfill. Not one jot or tittle shall pass away from the law. The text demands if you believed na di pa fulfill ang resurrection. Nanatili pa rin ang "nomos". Kasi kailangan LAHAT. Di isa, dalawa tatlo..etc. bago may lumipas sa nomos. Unless na naniniwala ka na tapos na ang resurrection.

Answer: 

Sa aking palagay, hindi ninyo lubos na napanood ang aking podcast presentation noong ika-16 ng Marso, o marahil ay napanood ninyo ito ngunit hindi pa rin ninyo lubos na nauunawaan ang aking mga pahayag. Bilang pagpapakita ng respeto sa mga manonood ng aking programa, susubukan kong maglaan ng sapat na oras upang sagutin ang inyong tanong at ipakita na hindi tama ang inyong mga argumento. 

Sa aking podcast, ipinaliwanag ko na ang “Kautusan at mga Propeta” na tinutukoy ni Cristo sa Mateo 5:17-18 ay hindi ang Sampung Utos, gaya ng interpretasyon ng ilang SDAs. Sa halip, batay sa maraming ebidensya mula sa loob at labas ng Bibliya, napatunayan ko na ang “Kautusan at mga Propeta” ay tumutukoy sa mga Old Testament Scriptures. Marami pang mga hula sa Lumang Tipan na hindi pa natutupad ngayon, tulad ng Second Coming ni Cristo kung saan magaganap ang pagkabuhay-muli. Ito ang dahilan kung bakit sinabi ni Cristo na “ang isang tuldok o isang kudlit, sa anomang paraan ay hindi mawawala sa kautusan, hanggang sa maganap ang lahat ng mga bagay.” Ibig sabihin nito, kahit ang pinakamaliit na bahagi ng mga Old Testament Scriptures. (na kinakatawan ng salitang “Kautusan” sa talata 18) ay mananatili hanggang hindi pa natutupad ang lahat ng mga hula, kasama na ang pagkabuhay-muli. Maliwanag na hindi kasama dito ang Sampung Utos at ang Sabbath, dahil ito ay lubos nang tinupad ni Cristo noong siya’y nabubuhay pa sa lupa para sa atin. 

Romans 5:19 (The Living Bible) Adam caused many to be sinners because he disobeyed God, and Christ caused many to be made acceptable to God because he obeyed.

Tagalog:

Romans 5:19 (The Living Bible) Dahil sa pagsuway ni Adam sa Diyos, marami ang naging makasalanan, at dahil sa pagsunod ni Kristo, marami ang naging katanggap-tanggap sa Diyos.

Pansinin na hindi sinabi sa talata na ginawa tayo ni Cristo na maging katanggap-tanggap sa Diyos dahil “tayo” ay sumunod sa mga kahilingan ng Sampung Utos. Sa halip, tayo ay tinanggap ng Diyos "dahil sa pagsunod ni Cristo." Walang duda na ang pagsunod na ito ni Cristo ay isang perpektong pagsunod, at walang tigil mula sa kanyang kapanganakan hanggang sa kanyang kamatayan. Ginawa ito ni Cristo para sa atin, sapagkat hindi natin kayang tuparin ito nang ganap. Kaya’t nasabi ni Apostol Pablo na tinupad na ni Cristo ang kahilingan ng kautusan para sa atin, kasama na ang Sampung Utos.

“Sapagka't ang hindi magawa ng kautusan, na mahina sa pamamagitan ng laman, sa pagsusugo ng Dios sa kaniyang sariling Anak na naganyong lamang salarin at dahil sa kasalanan, ay hinatulan ng Dios sa laman ang kasalanan: Upang ang kahilingan ng kautusan ay matupad sa atin, na hindi nangagsisilakad ayon sa laman, kundi ayon sa Espiritu.” (Romans 8:3-4, Tagalog AB)

Ang linaw ng sinabi sa talata, matapos matupad ni Cristo ng may kasakdalan ang requirements ng Kautusan "Upang ang kahilingan ng kautusan ay matupad sa atin." Matupad SA atin ang sinabi hindi matupad NA natin.

Ang sinasabi ni brother Marte Centeno na propesiya sa Daniel 12 tungkol sa resurrection sa future na hindi pa natupad ay nagpapatunay diumano na ang "Law" (Grk. nomos) ay nanatili pa din ay isang non-sequitur fallacy (begging the question/it does not follow). Ang ibig kong sabihin walang kaugnayan ang magaganap pa lang na future reaurrection sa paglipas ng Old Testment Law of Moses kabilang diyan ang 10 utos. Itinuro na noon ng mga apostol ni Cristo sa New Testament na lumipas na ang Kautusan at ito ay may hangganan nang dumating ang Messiah na Tagapagligtas noon at tinupad niya ang lahat ng mga hula na patungkol sa Kanya kahit alam nilang ang resurrection of the dead ay sa future pa. Narito ang mga halimbawang talata:

Colossians 2:16-17 (The Living Bible) 16 So don’t let anyone criticize you for what you eat or drink, or for not celebrating Jewish holidays and feasts or new moon ceremonies or Sabbaths. 17 For these were only temporary rules that ended when Christ came. They were only shadows of the real thing—of Christ himself.

Tagalog:

Colosas 2:16-17 (TLB) 16 Kaya’t huwag mong hayaang punahin ka ng sinuman sa iyong kinakain o iniinom, o sa hindi mo pagsasagawa ng mga kapistahan at selebrasyon ng mga Hudyo o mga seremonya ng bagong buwan o Sabbath. 17 Ito’y mga pansamantalang alituntunin lamang na nagtapos nang dumating si Cristo. Sila’y mga anino lamang ng tunay na bagay—ng mismong si Cristo.

Napakalinaw ng aral ng Diyos, ang Kautusan, kasama na ang Sampung Utos, ay hindi nilayon ng Diyos na manatili magpakailanman. Ayon sa talata 17, ang Kautusan na naglalaman ng “mga kapistahan at selebrasyon ng mga Hudyo o mga seremonya ng bagong buwan o Sabbath” ay mga pansamantalang alituntunin lamang na nagtapos nang dumating si Cristo. Kung susundan natin ang paniniwala ng mga SDAs, kapag ipinagpilitan pa nila na hanggang ngayon ay nanatili pa rin ang Kautusan o Sampung Utos kasama na ang weekly Sabbath, ay katumbas ito ng pagtanggi na si Cristo ay dumating na noon upang tuparin ito. Wala silang pinagkaiba sa mga modernong Hudyo na hanggang ngayon ay nag-aantay pa rin sa pagdating ng Mesiyas kaya patuloy pa rin nilang sinusunod ang mga kautusan ng Lumang Tipan. Ang mga SDAs ay patuloy pa ring sumusunod sa Sampung Utos ng Lumang Tipan, samantalang ito ay pansamantalang mga utis lamang at natapos na noong mahigit 2000 taon na ang nakalilipas mula nang dumating si Cristo. Sa madaling salita, 2000 taon na ang nakalilipas mula nang wakasan na ng Panginoon ang mga kapistahan at selebrasyon ng mga Hudyo o mga seremonya ng bagong buwan o Sabbath, ngunit ang pagkabuhay-muli ay malinaw na mangyayari pa sa hinaharap. Kaya walang kinalaman ang paglipas ng Kautusan sa hula ni Daniel 12 tungkol sa pagkabuhay-muli.

Mayroong problema sa argumento ni brother Marte Centeno kung ipipilit niya na ang “Law” (sa Grk. “nomos”) ay kinakailangan pa rin tuparin hanggang sa kasalukuyan. Mahalaga na maunawaan niya na ang salitang Griyego na “nomos” o “Law” ay tumutukoy sa 613 kabuuang Mosaic Law, kabilang na ang sampung utos. Kung tama si Bro. Centeno, bakit ang sampung utos lamang ang kanilang sinusunod mula sa 613 na mga utos? Upang maging lohikal at magkakatugma ang kanyang argumento, nararapat na isama pa rin nila ang iba pang 603 na utos, kasama na ang mga “ceremonial laws” na ayon sa mga SDA ay hindi na dapat sundin dahil sa ating panahon.

Sa pagwawakas, nais kong irekomenda ang aming paninindigan hinggil sa kahulugan ng “Law and the Prophets” ayon sa Mateo 5:17-18. Ayon sa aming pagsusuri, hindi lamang ang Sampung Utos ang itinuturing na bahagi ng “Law and the Prophets,” kundi pati na rin ang mga Old Testament Scriptures na mas nagsasaalang-alang sa kabuuang konteksto at pagkakasuwato ng buong Bibliya.

Recommended to read:
https://formeradventistph.blogspot.com/2024/02/seventh-day-adventists-answered-verse.html